💐 सद्गुरूंचे समावेत अद्भुत दीपावली 💐

 दीपावली  पुष्प  १

 सद्गुरूंचे समावेत  अद्भुत दीपावली 

 आठहीग्रामी भिक्षा केली दिपावळीदिनी तुम्हीच ना,

भास्कर हस्ते चार सहस्रा भोजन दिले तुम्हीच ना 

गाणगापुरी असता श्रीगुरु । सण आला दीपावली थोरू ।। 

                                                             एकदा श्री नृसिंह सरस्वती स्वामी महाराज गाणगापूरला असताना मठामध्ये सात भक्त त्यांना दिवाळी करीता निमंत्रित करण्यासाठी आले ,महाराज भक्त वत्सल आहेत आणि आपले प्रेमळ बोलावणे नाकारणार नाहीत हि सर्व भक्त मंडळींना खात्री होती पण सर्व एकत्र आल्यानंतर आता गुरुमहाराज कोणा एका ठिकाणी जाऊ शकतील व ते ठिकाण आपले असावे या साठी त्या सात भक्तांमध्ये कलह सुरु झाला ,प्रत्येकाची विनंती ऐकून मठातील भक्त मंडळी काळजीत पडली . ऐन दिवाळीच्या दिवशी गुरुमहाराज मठात नाहीत हि कल्पना त्यांना करवेना . आता गुरुमहाराज काय निर्णय घेतात याकडे सर्व पाहू लागले ,यावर गुरुमहाराजांनी एकेका भक्ताला जवळ बोलावले व सांगितले मी तुझ्या घरी येत आहे आता समाधानी असावे मात्र हे वर्तमान गुप्त ठेवावे . यावर आनंदित होऊन ते सात भक्त आपापल्या घरी जाते झाले ,तेव्हा मठात भक्तगण म्हणू लागले ,महाराज आम्हाला सोडून जाऊ नये ,दिवाळी आम्हासोबत साजरी करावी . यावर गुरुमहाराज म्हणाले मान्य आहे ,मी इथेच असेंन . काही दिवसांनी दिवाळी नंतर ते सात भक्त पुन्हा योगायोगाने दर्शनाला आले व त्यांची भेट झाली ,अर्थातच गुरुमहाराजांनी आपल्या घरी येऊन आपल्याला आशीर्वाद दिले ते प्रत्येक जण सांगू लागला व त्याच्या पुष्ट्यर्थ आपण त्यांना दिलेली भेट मठात विराजमान असलेली दाखवू लागला ,हा सगळा प्रकार पाहून मठामधील भक्तगण हस्तक्षेप करीत म्हणू लागले कि गुरुमहाराज इथे मठातच होते आणि आम्ही सर्व त्यांच्या सोबतच होतो ,स्वपक्ष सिद्ध करताना कलह वाढू लागला तेव्हा गुरुमहाराज म्हणाले आता थोडं लक्ष द्या ,मी सातही जागी गेलो होतो आणि इथेही होतो तेव्हा सर्वांच्या डोक्यात लख्ख प्रकाश पडला व गुरुमहाराजांच्या अलौकिक  लिलेचे कौतुक व्यक्त करीत सर्व भक्त स्वस्थानी गेले     

अशी अद्भुत व अलौकिक दिवाळी अनुभवणारे साक्षीदार  भक्त किती भाग्यवान म्हणावेत  बरे ..... आज अनेक जन्म  गेले पण त्या घरात व वंशात सुख समृद्धी व समाधान आहे .

 ।। भीमातटि असे गाणगाभुवन । पुण्यभूमि असे या त्रिभुवन ।।